Mann vart funnen omkomen

Det opplyste operasjonsleiar Morten Rebnord i Vest politidistrikt i Politiloggen sundag morgon.

Innsatsleiar Per Gunnar Thrane ved Kvam politistasjon seier at politiet fekk melding klokka 13.26 laurdag. Naboar på Botnen hadde ikkje sett mannen sidan tysdag.

Like før klokka 18 laurdag vart hjelpekorpsa i Øystese og Norheimsund, Norske Redningshunder og fleire andre kalla ut til Botnen i Fyksesundet for å leita etter mannen.

Trøbbel med innlogging

Thrane fortel at det i samband med hovudredningssentralen vart vedteke å starta ein leiteaksjon. Mannskap til fots, redningshelikopter og drone vart sendt inn i området. Private båtar og Raudekrossen-båten RC «Bjørgvin» frakta folk innover frå Porsmyr. Også lokalkjende var med på å leita. 

Kluss med innlogging med Bank-ID gjorde aksjonen utfordrande. Politiet fekk ikkje sett kvar leitemannskapet var, og leitemannskapet fekk ikkje sett kvar det skulle leita, ifylgje Thrane.

– Det var vanskeleg å kommunisera og leia mannskapet der det skulle søkja, seier Thrane. 

Ifylgje innsatsleiaren deltok om lag 70 frivillige. Klokka 23.38 kom melding om funn frå ein hundeførar. På grunn av dekningsproblem gjekk det noko tid før meldinga var verifisert, seier Thrane.

– Framstår som uhell

Mannen vart funnen død om lag éin kilometer i luftlinje frå Botnen på veg opp mot stølen Myrsete, ifylgje Thrane.

– Me veit ikkje kva som har skjedd, sidan det har skjedd utan vitne. Det framstår som eit uhell, seier innsatsleiaren.

Thrane kan ikkje seia noko om kor lenge mannen har vore død, men han kan ha lege der i fleire dagar. Mannen vart henta med helikopter og frakta til Bømoen. Der vart han henta av gravferdsbyrå. Måndag vart han frakta til obduksjon i Bergen. 

Politiet opprettar undersøkingssak. Thrane vonar at obduksjonsrapporten kan seia noko om årsaka til at mannen døydde.

– Utan å forskotera noko ser det ikkje ut til å vera noko straffbart, men det er for tidleg å seia noko om det, seier han.

Takkar frivillige

Innsatsleiaren takkar alle som stilte opp i redningsaksjonen. Det tek tid før ein kjem i gang med søket når ein treng båt og helikopter for å frakta folk til området, seier Thrane.

Dessutan er terrenget i området bratt og utfordrande. Difor var det naudsynt med folk som visste kvar dei kunne gå. Han trur redningsaksjonen har vore krevjande for dei som deltok.

– Dei stod på og gjorde ein formidabel jobb, seier Thrane.

Politiet prøvde å kontakta pårørande på telefon, men fekk ikkje kontakt på natta. Difor vart ikkje pårørande varsla før dagen etter.