– Lyn starta brann i Kvam

Eit lynnedslag var truleg årsaka til ein brann i terrenget ved Mundheim i Kvam onsdag ettermiddag. Det skreiv NRK Vestland.

Kvam brann og redning fekk melding om brannen klokka 17.40. Brannmannskap fekk kontroll med hjelp av vatn pumpa opp frå sjøen, seier innsatsleiar Svein Valland Laupsa til HF. Han seier terrenget var bratt og ulendt, og at brannmannskapet frå Omastrand difor måtte tenkja kreativt.

Laupsa opplyser at grannar og bygdefolk fortener skryt for å ha stilt opp på fleire måtar. Dei var med på å bera slangar i terrenget, stilte med ATV for å frakta pumpa til sjøen og stilte med båt.

Ifylgje Laupsa var det liten fare for brannspreiing frå det om lag femti meter lange og breie området på eit nes ved Furevika, litt sør for fylkesveg 576 og nord for Salbuvik. Området var naturleg nok avgrensa av bekker og andre hinder.

Laupsa opplyser at ein ikkje kan vera sikker på årsaka til brannen, men fortel at folk i området såg eit lynnedslag og såg at det tok til å brenna. Det er såleis god grunn til å dra den konklusjonen, slår han fast.