Vinnarar: Thomas Låte og Rikke Skåttet vart noregsmeistrar i miks dobbel i noregsmeisterskapen. Foto: Hardanger bordtennisklubb

Låte vart noregsmeister

Thomas Låte i Hardanger bordtennisklubb vart sundag noregsmeister i klassen miks junior dobbel. Dette hende under NM for juniorar på Fornebu utanfor Oslo. Låte spela saman med Rikke Skåttet frå B-72, melder HB på heimesida. Duoen tapa berre eitt sett på vegen til finalen, der dei to slo Martine Toftaker frå B-72 og Fredrik Buringrud-Larsen frå Oslo.

Som om ikkje det var nok, tok Låte sølv i singelklassen og i herrar junior dobbel. Han slo Erik Eng frå Fokus 3-2 i semifinalen, før han tapa for Borgar Haug i finalen i singelklassen. I dobbelklassen spela han saman med Sigurd Sørheim frå Fornebu. Dei rauk ut etter 1-3-tap for Haug og Alexander Klerck Fransson frå Fokus i semifinalen.