Eit lovforslag som forbyr pelsoppdrett, blir sendt ut på høyring.Foto: Alf Ove Hansen / NTB / NPK

Lovforslag om pelsdyrforbod ut på høyring

Regjeringa sender eit forslag til ny lov ut på høyring som forbyr pelsdyrhald. Der blir òg kompensasjonen til pelsdyrbøndene konkretisert.

Men Norges Pelsdyralslag, som vart informert om ordninga på eit møte med Landbruks- og matdepartementet onsdag, er ikkje fornøgd, skriv Nationen.

– Etter dagens møte med LMD, er det klart at lovproposisjonen blir send på høyring i morgon, og at vi endå ein gong må jobbe hardt opp mot Stortinget for at resultatet skal bli riktig og rettferdig, skriv Pelsdyravlslaget i ein SMS, som onsdag vart send til alle pelsdyrbøndene.

Artikkelen held fram under annonsen.

Etter fleire rundar varsla landbruksminister Olaug Bollestad (KrF) Stortinget i oktober om at kompensasjonsordninga for pelsdyrbøndene vil vere klar i månadsskiftet november/desember, i samband med lovforslaget.

Regjeringa går inn for at kompensasjonen skal utmålast etter avgjerdene i lova om oreigningserstatning. Det betyr at bøndene vil få det som blir omtalt som «full kompensasjon».

Stortinget gjekk inn for eit pelsforbod i 2019. Saka blir rekna som ein stor siger for Venstre, som både i regjeringsforhandlingane på Jeløya i 2018 og på Granavolden i 2019 fekk gjennomslag for at pelsdyrnæringa skal avviklast innan 2025.

(©NPK)