Heimekontor med mykje stillesitjing er ikkje bra for kroppen i lengda.Illustrasjonsfoto: Thomas Brun / NTB / NPK

Kroppen har det ikkje bra på heimekontor

Dei som har heimekontor i desse dagar er mindre fysisk aktive enn dei er klar over. Blir du sitjande for lenge framfor PC-skjermen kan det vere helseskadeleg.

– Forskinga viser at personar som sit mykje, og samtidig er lite fysisk aktive, har større risiko for vanhelse og tidleg død, opplyser Linda Granlund, divisjonsdirektør i Helsedirektoratet til NRK.

Å sitje i åtte-ni timar om dagen er ikkje bra viss ein ikkje er aktiv etterpå. Dei med heimekontor bør derfor ta ein runde i stova fleire gonger dagleg.

– Korte avbrekk frå stillesitjing kan vere bra for auka blodsirkulasjon, betre regulering av blodsukker og bevegelse av musklar og ledd, oppfordrar Granlund.

Mange timar på heimekontor kan ein likevel kompensere med å vere fysisk aktiv 60–75 minutt kvar dag, legg ho til.

Undersøkingar viser også at mange trur dei sit mindre stille enn dei faktisk gjer.

– Fysisk aktivitet er det viktigaste du gjer for helsa di, seier helse- og treningsterapeut Kristin Granum Rosebø til kanalen.

Ta gjerne lunsjpausen utandørs, frisk luft blir du kvikk av. Rekk du ein runde i nabolaget er det endå betre.

– Bruk dei pausane der du likevel lettar på rumpa til å skape litt sirkulasjon. Bryt opp den posisjonen du sit i og strekk ut hofte og kne, oppfordrar treningsterapeuten.

(©NPK)