KrF vil påleggje kommunane å tilby skulegudsteneste
KrF-leiar Dag-Inge Ulstein meiner alle kommunar bør leggje til rette for skulegudstenester før jul, og reagerer kraftig på at Hamar kommune har sagt nei til gudsteneste for skuleelevar.
Ulstein meiner alle skulebarn bør vere til stades under julegudstenestene.
– Heile fundamentet for landet og samfunnet vårt er så sterkt tufta på den kristne kulturarven. Høgtidene, jula og den formidlinga er ein sterk og viktig del av det. Det er det ingen som har vondt av, seier Ulstein til Nationen.
Annonse
KrF har fremja forslag i Stortinget om å påleggje kommunane å tilby skulegudstenester. Forslaget vart først omtalt av Aftenposten , men det er første gong KrF-leiaren kommenterer saka.
Bakgrunnen er at skuleleiinga i Hamar kommune i år har valt å droppe julegudsteneste i regi av skulane. Det meiner KrF-leiaren er eit teikn på at norske verdiar er under press. Ulstein kallar også avgjerda i Hamar «tullete».
– Det er tullete når vi igjen må utfordre rundt julegudstenester, seier KrF-leiaren, og legg til:
– Eg trur veldig mange er glade i dei verdiane og kan vere opptekne av røter. Men vi må forstå kva verdiar og røter det er, og heile vegen sikre at neste generasjon blir godt kjend med dei. Dette er eit stort samfunnsansvar, meiner Ulstein.
(©NPK)
