Krev strengare vern på Kvamskogen

Naturvernforbundet Hardanger meiner framlegget til ny kommunedelplan for Kvamskogen tek meir omsyn til naturen enn tidlegare planar. Likevel etterlyser forbundet tydelegare føresegner og sterkare vern mot vidare nedbygging.

I ei høyringsfråsegn til Kvam herad skriv lokallaget at planen for 2026–2038 burde vore meir forpliktande når det gjeld myr, våtmark, vassdrag og utbyggingsgrenser. Organisasjonen meiner at erfaringane frå tidlegare planar viser at gode intensjonar ikkje er nok dersom dei ikkje vert fylgde opp i reguleringsplanar og i sjølve utbygginga.

Fråsegna er signert styreleiar Klaus Rasmussen og styremedlem Oddvar Soldal.

«Kva sa me?»

Naturvernforbundet Hardanger viser til at det også kom med innspel til planprogrammet i 2022. Då bad forbundet heradet om å skaffa oversyn over kor mykje naturareal som har vorte omdisponert dei siste ti åra, kva dispensasjonar som er gjevne, og kva verknader desse har hatt for naturområda.

Planframlegget gjev ikkje gode nok svar på spørsmåla, skriv organisasjonen i fråsegna.

Vidare rosar Naturvernforbundet heradet for at naturvern og naturmangfald har fått større plass samanlikna med tidlegare planar.

– Me vert freista til å hevda «kva sa me?» når me ser korleis naturvern og mangfald som Naturvernforbundet har etterlyst og peika på i dei siste tiåra, vert teke meir og meir omsyn til i offentleg planarbeid, også på kommunenivå, skriv forbundet.

Likevel saknar forbundet ein meir aktiv bruk av kunnskapen. 

– Skru av lysa!

Eit av hovudkrava frå organisasjonen er at all myr og våtmark må vernast mot utbygging. Formuleringa i planframlegget om at myr og våtmark «skal takast omsyn til», er for svak, skriv Naturvernforbundet. 

Organisasjonen meiner at heradet må setja ei klar yttergrense for utbygging på Kvamskogen, og at ingen ubygde område bør opnast for nye hyttefelt. Då er det betre med fortetting med strenge krav til vegar, parkering og storleik på bygg, skriv forbundet i fråsegna.

Hytter bør ikkje ha større byggjeareal enn 100 kvadratmeter, og garasjar bør ein ikkje tillata. Vidare må byggjegrensa frå vatn, elvar og bekkar vera minst 20 meter, meiner naturvernarane.

Eit anna tema i fråsegna er kunstig lys. Naturvernforbundet meiner kommunedelplanen må ha felles reglar for lysbruk, også i område som alt er regulerte og utbygde. Mellom anna eit forbod mot synleg lys i hytter når dei ikkje er i bruk vert føreslege.

Naturvernforbundet støttar at det ikkje vert lagt opp til nye alpinområde på Kvamskogen.