Kraftproduksjonen i Sørvest-Noreg var historisk låg førre veke

Kraftproduksjonen i Sørvest-Noreg var førre veke på det lågaste nivået på 10 år, viser nye tal frå NVE.

– Kraftproduksjonen i Sørvest-Noreg var historisk låg førre veke. Dette er det lågaste nivået vi har sett for denne landsdelen i veke 31 på 10 år, seier direktør i Noregs vassdrags- og energidirektorat ( NVE), Inga Nordberg.

Dei høge kraftprisane sør i Noreg har samanheng med den låge kraftproduksjonen og eit høgare prisnivå i landa rundt oss. NVE opplyser at den reduserte kraftproduksjonen sør i landet bidrog til høgare nettoimport til dette området i veka som gjekk.

– At kraftprisane følgjer prisnivået til nabolanda er eit uttrykk for at fleire vasskraftprodusentar sparer på vatnet. Dermed blir det også mindre eksport, seier Nordberg.

Den reduserte kraftproduksjonen i det sørlege Noreg, som ofte blir omtalt som straumområda NO1, NO2 og NO5, bidrog til høgare nettoimport til desse områda.

Nærmar seg normalt nivå

Sjølv om fyllingsgrada i magasina i Søraust- og Sørvest-Noreg auka med 1,1 prosentpoeng førre veke, er dei framleis på eit lågt nivå for årstida.

Fyllingsgrada i Vest-Noreg auka med 3 prosentpoeng, og nærmar seg no normalt nivå for årstida. Ifølgje NVE er magasina i ferd med å fyllast opp, og nedbøren blir viktig utover hausten.

Kan forvente høge straumprisar

Det kan komme mykje nedbør gjennom hausten, og forholda internasjonalt kan endre seg.

– Men vi kan også få mindre nedbør enn normalt, ein kald vinter og ein framleis uroleg situasjon i Europa. Dette gjer at situasjonen sør i Noreg framleis kan bli krevjande, skriv NVE.

– Så lenge prisane på gass og andre brensel held fram med å vere høge, kan vi forvente at dei norske straumprisane vil liggje på eit høgt nivå også framover i tid, skriv NVE.

Vidare skriv dei at dersom vasskraftprodusentane held tilbake på vatnet, vil det styrkje ressurssituasjonen, men det vil også bidra til auka prisar.

(©NPK)