Det er innført forbod mot gravlys med metallokk i fleire kommunar, fordi lokka blir sleppte ned i dyrkbar mark av fuglane. Illustrasjonsfoto: Jarl Fr. Erichsen / NTB scanpix / NPK

Kommunar innfører forbod mot gravlys med metallok

Det blir innført forbod mot gravlys med metallok i enkelte kommunar. Årsaka er at loka kan hamne i dyrkbar mark etter at fuglar plukkar dei opp.

– Kvar vinter og vår dei siste åra har eg plukka opp rundt 50 gull- og sølvfarga gravlyslok frå jorda mine som ligg inntil kyrkja her i Heidal, seier gardbrukar Per Heringstad til Nationen.

Fuglar søkjer ofte etter både blanke gjenstandar og stearin, og skjora i området har ifølgje Heringstad fatta stor interesse for gravlysa på kyrkjegarden.

– I mange tilfelle tek nok skjora med seg gravlysa, et opp stearinen og dumpar dei blanke metalloka på jorda rundt kyrkjegardane. Ved eitt tilfelle har eg òg funne ein elektrisk lykt på jordet her, seier Heringstad.

Kyrkjetenar Egil Bergdølmo seier til avisa at det i fleire år har vore eit problem at fleire gravlys endar opp inne på jorda til naboane til kyrkjegarden.

– Spesielt problematisk er små gravlys med metallok, som fuglane lett får laus med nebbet og tek med seg til jorde rundt kyrkja. Under graslåtten kan desse lokka bli kutta i små metallbitar – og i verste fall hamne i fôret og føre til husdyrdød, seier Bergdølmo.

Bergdølmo seier det i Sel kommune er vedteke totalforbod mot bruk av små gravlys med lause lokk frå juni i år.

Eit liknande forbod finst ifølgje kyrkjeverje Jorunn Elvestad i Sel òg i Bodø.

(©NPK)