Kan bli enklare å byggje terrasse og tilbygg på eigen eigedom

Kommunal- og moderniseringsminister Nikolai Astrup (H) vil gjere det mogleg å byggje terrassar og tilbygg på eigen eigedom utan at ein må søkje om dette.

Astrup foreslår at terrassar med ei høgd på inntil 1 meter frå ferdig planert terreng kan førast opp utan søknad, skriv VG.

Terrassen må vere i tilknyting til ein bygning og kan ikkje stikke lenger ut frå fasaden på bygget enn 4 meter. Den kan ikkje ha tak, men kan ha eit rekkverk på inntil 1,2 meter. Slike terrassar skal dessutan ikkje reknast med i utnyttingsgrada til tomta.

Artikkelen held fram under annonsen.

I dag må ein søkje kommunen om løyve ved oppføring av terrassar som er høgare enn 0,5 meter over ferdig planert terreng, og terrassane skal reknast med i eigedommens regulerte utnyttingsgrad.

I tillegg foreslår Astrup at ein skal kunne setje opp eit tilbygg på 15 m² som kan brukast til opphald og å bu i, utan at ein må søkje om det.

Forslaget blir no sendt på høyring.

(©NPK)