Kaldaste og tørraste januarmånad sidan 2010
Ikkje sidan 2010 har januar månad vore så kald og tørr som han var i 2021. I Innlandet og Viken var enkelte vêrstasjonar opp mot 10 grader kaldare enn normalt.
Månadstemperaturen for heile landet var 3,3 grader under normalen, som er frå 1991 til 2020. Det gjer månaden til den kaldaste sidan 2010, skriv Meteorologisk institutt på nettsidene sine.
Kaldast var det i Innlandet og Viken, der enkelte stasjonar hadde avvik på 8 til 10 grader under normalen. Nokre få stasjonar i Troms og Finnmark hadde avvik på rundt 1 grad over normalen.
Artikkelen held fram under annonsen.
Den lågaste temperaturen som vart målt i januar var i Kautokeino, der det 13. januar vart målt 35,5 minusgrader.
Den «kaldaste» vêrstasjonen var Leirflaten i Innlandet som med dei 21 minusgradene sine låg 10,1 grader under normalen. Varmast var Ytterøyane fyr og Svinøy fyr der det vart målt 2,6 plussgrader, høvesvis 1,6 og 1,9 under normalen.
Månadsnedbøren i januar var 55 prosent av normalen, noko som gjer månaden til den tørraste sidan 2010.
Tørrast var det i Nord-Noreg, der ei rekkje stasjonar hadde under 10 prosent av den normale nedbøren. I Viken fekk eit par stasjonar opp mot det dobbelte av normalen.
(©NPK)
