Justisministeren: Dette kan du gjere og ikkje i påska

Det blir ikkje noka normal påske, men vi må alle gjere så godt vi kan, meiner Monica Mæland (H). Ho opnar døra for mange aktivitetar trass i smittetiltaka.

Fleire tilbod som normalt er opne i påska, vil i år vere stengde. Ikkje fleire enn fem personar bør vere samla, og ein bør halde to meters avstand til andre menneske.

Det er heller ikkje lov å overnatte på hytta, understreka justisministeren på ein pressekonferanse torsdag ettermiddag.

– Det generelle rådet er framleis at alle ein bør unngå unødvendige fritidsreiser, sa Mæland.

Men det er lov å drive friluftsliv, fortrinnsvis frå der ein bur. Ein kan handle mat og klede, ein kan gå turar i byen og i skog og mark, dra på sjøen, bestille handverkarar og pusse opp huset, rydde, lese og følgje med på påskekrim og å høyre på podkast, ifølgje justisministeren.

– Ein må prøve å unngå å setje seg i ein situasjon der ein treng hjelp frå andre. Det handlar rett og slett om å vere ekstra varsam.

Justisministeren oppmoda vidare folk til å ta kontakt med folk som har det vanskeleg, og familie og venner som kan vere einsame.

– Vi som kan bidra, bør prøve å gjere det, sa ho.

(©NPK)