Jegerar som gjennomførte skyteprøve i fjor, slepp å gjere det i år. Illustrasjonsfoto: Gorm Kallestad / NTB scanpix / NPK

Jegerar slepp skytetrening

Jegerlag er bekymra for fleire skadeskotne dyr, då jegerar som gjennomførte skyteprøven i fjor, slepp å gjere det i år.

For å få lov til å jakte på storvilt, må ein bestå skyteprøve for å bevise at ein klarer å unngå skadeskyting. I år er det bestemt at dei som klarte skyteprøven i fjor, ikkje treng å ta oppskyting no, skriv NRK Vestfold og Telemark.

Leiaren i Eidanger jeger- og fiskarlag, Rune Lauritzen, er bekymra for at manglande skyteprøvar vil føre til fleire skadeskotne dyr.

– Som jeger skal ein ut i skogen for å ta liv. Det må vi gjere så raskt og så humant som mogleg. Då er det ditt ansvar at du har øvd nok på førehand, seier Lauritzen til NRK.

Miljødirektoratet tok avgjerda om å droppe skyteprøven. Dei meiner koronasituasjonen gjorde det vanskeleg å gjennomføre skyteprøven som normalt.