Gjæsene er i ferd med å forlate kalde Noreg. Er du heldig kan du sjå flokkar på tusenvis av fuglar flyge over hovudet på deg i enormt tempo. Kva fuglar som flyg på himmelen på bilete er ikkje kjent. Arkivfoto: Per Løchen / NTB/ NPK

I desse dagar er himmelen full av gjæser

Gjæsene er i ferd med å forlate kalde Noreg. Er du heldig kan du sjå flokkar på tusenvis av fugl flyge over hovudet på deg i enormt tempo.

– Eg høyrer dei som regel god tid i førevegen før eg ser dei på himmelen. Eg oppmodar alle til å sjå opp når dei flyg forbi, det er veldig fascinerande, seier sjølvutnemnd fuglesjåar Bjørg Støen til NRK.

Ho såg til saman opp mot 2.000 fuglar søndag. Likevel er det ikkje uvanleg å sjå så mange gjæser om gongen, ifølgje ornitolog Tom Roger Østerås.

– Gjæser er veldig sosiale. Rett ved der eg bur fekk eg sjå opp mot 8.000 fuglar på same åker. Det er litt tryggare for dei å samle seg når det gjeld rovdyr og jegerar, seier Østerås til NRK.

Gjæser flyg i rundt 80 kilometer i timen. Mange av dei kjem heilt frå Svalbard og skal vidare sør til Danmark, Belgia eller Storbritannia.