Hyttestraumforbruket er dobla på tjue år

Ifølgje ei undersøking gjort av Nationen har forbruket meir enn dobla seg frå 2003 til 2023, med ein auke på så mykje som 105 prosent.

I 2023 låg det totale straumforbruket på hytter på 2427 GWh, noko som er høgare enn forbruket i heile Stavanger kommune. Dette er også meir enn det samla forbruket frå primærnæringane jordbruk, skogbruk og fiske.

– Det er mange store hytter her og nokre av dei dyraste hyttene som er selde, er selde her. Det indikerer noko om storleik og innhald, seier Sigrid Simensen Ilsøy (Sp) til Nationen. Simensen er ordførar i Hol kommune, som har det høgaste straumforbruket frå hytter i landet.

Linda Mæhlum Robøle (Sp), ordførar i Etnedal kommune, peiker på at moderne hytter ofte har høgare standard enn vanlege bustadhus.

– Vi legg til rette for hytteutbygging, i praksis ein bustad nummer to med den standarden vi har i dag og det energiforbruket det fører med seg. Eg trur faktisk standarden ligg over eit vanleg bustadhus, i alle fall her i Etnedal.

(©NPK)