Hugs å levere skattemeldinga
Torsdag 30. april er siste frist for å levere skattemeldinga.
9 av 10 har opna skattemeldinga og 1,9 millionar nordmenn har levert den. Det skriv Skatteetaten i ei pressemelding tysdag, to dagar før fristen for å levere skattemeldinga.
– Det er viktig å sjekke meir enn om du har førebels skatt til gode eller skatt å betale. Er det noko du må fylle inn, som ekstra inntekter, eigedom eller anna formue du har i andre land? Sjekk også at du har fått med deg frådraga du har krav på, seier Marta Johanne Gjengedal, divisjonsdirektør i Skatteetaten.
Artikkelen held fram under annonsen.
Tidlegare enn før
Leverer ein skattemeldinga før 30. april kan ein forvente å få skattepengar ein har til gode tidlegare enn før.
Fleire får skattepengar tilbake eit par veker etter å ha levert skattemeldinga. Nesten 900.000 personar har allereie fått skatteoppgjeret sitt, og det er utbetalt 9,3 milliardar kroner i skatt til gode
Utsett leveringsfrist
For sjølvstendig næringsdrivande har fristen for å levere skattemelding blitt forlengt frå 31. mai til 31. august.
(©NPK)
