Høgtid vert tapstid for skisentera

Påskestengde alpinanlegg fører til store inntektstap.

Dagleg leiar i Furedalen Alpin, Jan Guttorm Skeie, fortel at snømangel har gjort at sesongen allereie har vore dårleg. Håpet var at ein god påske skulle verta redninga. Det gjekk i grus då regjeringa valde å lata koronarestriksjonane vara til 13. april – i fyrste omgang. Regjeringa har varsla ei kunngjering om eventuelt framhald onsdag.

– Me mistar truleg mellom to og tre millionar kroner når me må halda stengt frå 13. mars til 13. april. Det var desse pengane me skulle leva av gjennom sommaren, når anlegget er stengt. Når pengane forsvinn, vert det tungt. Det gjer vondt å sjå tomme løyper i påsken. Me saknar gjestene våre, seier han.

Skeie seier at ein ikkje kjem til å rigga ned og stengja anlegget før etter påske.

– Om styresmaktene lettar på restriksjonane 13. april, kan me kanskje køyra heisane nokre dagar og helgar i slutten av april, seier han.

– Sommaren er viktig

For Visitfonna AS på Folgefonna er ikkje påsken like avgjerande.

– Me er eit sommarskisenter. For oss er sommaren viktigare enn påsken. Me tapar neppe meir enn mellom ti til tjue prosent av omsetninga av å halda stengt i påsken. Får me ikkje halda ope i vår og sommar, vert det langt meir kritisk, seier dagleg leiar Michael Iversen.

Ikkje alle skiheisane i Noreg står i påsken. Ifølgje NRK skal Kongstinden alpinsenter i Lofoten ha fått løyve frå kommunen til å halda ope.

– Kommunelegen har sidestilt det å bruka anlegget med det å gå langrenn. Me meiner skisenteret på Folgefonna òg må kunna sidestillast med langrenn. Folk held god avstand i løypene, og me kan sørgja for at det vert avstand i køane, seier Iversen.

Han har vore i kontakt med rådmannen i Ullensvang og lagt fram argumentasjonen. Då HF snakka med Iversen før helga, hadde han ikkje fått svar.

Skeie kjem ikkje til å kontakta kommunen og slå i bordet med anlegget i Lofoten.

– Kongstinden er eit dugnadsbasert anlegg med ein heis som tek berre éin person om gongen. Anlegget vert mest brukt av lokale og har aldri kø. Då kan det ikkje samanliknast med Furedalen. Der har me to til tre tusen personar innom i løpet av ein god påske, seier han.

– Tek knekken på bransjen

Det kjem stadig nye økonomiske hjelpepakkar frå regjeringa. Alpinanleggenes Landsforeining (ALF) er ikkje imponert. I ei pressemelding med tittelen «Regjeringen stenger alpinanleggene for godt» seier leiaren i ALF, Camilla Sylling Clausen, at krisepakkane som har kome til no, ikkje hjelper alpinanlegga.

Ho meiner bransjen står i ei særstilling sidan dei fleste anlegga ikkje har inntekter etter at snøen forsvinn. Likevel vert det stilt strenge krav om at alpinanlegga skal gjennomføra vedlikehaldsarbeid. Clausen hevdar at med dei pakkane som har kome så langt, får alpinanlegga berre dekt ein liten del av ei kostnadene dei har medan anlegga er stengde.

– Dei faste kostnadene for alpinanlegga i denne perioden er på 500 millionar kroner. Vedlikehald står for ein stor del. Vår bøn til Stortinget er at politikarane set seg inn i situasjonen og lagar ei løysing som er skreddarsydd for våre medlemer. Om ikkje Stortinget gjer noko, får me eit konkursras i ein elles levedyktig bransje, seier Clausen.