HF-journalist fall i sjøen framfor kongeparet

- Eg håpar ikkje kongen såg det.

Ikkje alt gjekk som det skulle då kongeparet vitja Jondal - i alle fall ikkje for journalist Eline Sandnes Fosse (21), som hadde årets andre arbeidsdag som sommarvikar for Hordaland Folkeblad då kongen og dronninga kom til Hardanger.

Etter avslutta program på Juklafjord skulle kongeparet attende til båten for å reisa vidare. Fosse stilte seg ved landgangen for å fotografera. Der sklei ho på steinen. Ho mista balansen, og av omsyn til kameraet som hang kring halsen, kunne ho ikkje ta seg for med hendene då ho fall.

I staden enda ho i sjøen - framfor kong Harald, dronning Sonja, jondølingar og pressefolk frå NRK, TV2, Bergens Tidende og Se og Hør.

- Eg tenkte mest på å redda kameraet, fortel Fosse.

«Fall pladask for kongen»

Til alt hell gjekk det bra med bladfyken, som har sin fjerde sommar i HF. Ho vart berre blaut. Også lagnaden til kameraet verkar positiv.

Korkje kongen eller dronninga gav uttrykk for at dei la merke til hendinga. Kanskje var dei opptekne av å høyra på Herand musikklag, som spelte då Fosse fall. Men assisterande kommunikasjonssjef ved det Kongelege hoff, Sven Gjeruldsen, fekk seinare, då fleire journalistar var samla i presserommet i rådhuset, melding frå Kongeskipet med spørsmål om det gjekk bra med journalisten som hamna i vatnet.

HF kan elles melda om god stemning og mykje velmeint humor i presserommet då HF sine utsende returnerte. Ein føreslo overskrifta «Fall pladask for kongen».

- Dårleg tidspunkt

Fosse ser humoren i det som skjedde.

- Men for ei som ikkje likar å verta teken bilete av, kunne eg vel ikkje ha valt eit dårlegare tidspunkt å falla i vatnet på.

- Trur du kongen såg deg?

- Eg håpar ikkje det! Men eg hadde ei god plassering då dei skulle gå over landgangen. Eg trur diverre ikkje eg knipsa før eg fall, seier ho.

- Det verste er at me tulla med dette på førehand: at eg ikkje skulle verta «ho som fall ned frå eit tre då ho skulle fotografera kongeparet». Og så skjer dette!

Ho synest det var hyggeleg med melding frå Kongeskipet «Norge».

- Har du lært noko av dette?

- Hald deg i presseområdet. Eller - nei, det kunne ha vorte eit bra bilete.

- Alt for jobben?

- Alt for jobben.