Herde Kompositt (HK), som gjekk konkurs for eitt år sidan, relanserer verksemda på Årsnes og går inn i Odda Industrier med 80 millionar kroner i signerte kontraktar.
Selskapet melder samstundes at det har ledig kapasitet og ynskjer nye kundar innan spesialiserte kompositt- og plastløysingar.
Annonse
Ifylgje ei pressemelding frå selskapet måndag er HK vorte ein integrert del av Odda Industrier, eigt av Pangea AS. Samanslåinga av kompetansen til HK på avanserte komposittkonstruksjonar og den over femti år lange historia til Odda Plast skal styrkja konkurransekrafta.
– Me har no etablert ein struktur som gjer oss i stand til å skalera raskt. Me har ledig kapasitet og søkjer aktivt nye prosjekt der vi kan bruka vår spisskompetanse på avanserte komposittløysingar, særleg mot maritim sektor, havbruksnæringa og landbasert industri, seier Bjørn Angeltveit, CEO for Herde Kompositt og Odda Industrier, i pressemeldinga.
Ordreboka er i hovudsak knytt til serieproduksjon av spesialfartøy som snart vert lanserte. I tillegg har selskapet sikra seg opsjonsavtalar om bygging av fleire fartøy.
– For våre kundar betyr dette ein partnar med finansiell ryggrad og dokumentert leveringsevne. At me vinn slike kontraktar, kombinert med opsjonar på fleire fartøy, viser at marknaden har stor tru på kompetansen våre fagarbeidarar sit på, seier dagleg leiar Audun Dahl i pressemeldinga.
Annonse
Flyttinga frå Ølve til Årsnes skal samla ressursane og leggja til rette for eit meir moderne og effektivt industrimiljø med god tilgang til sjøtransport. HK vert samlokalisert med ECG på Årsnes. Selskapet leverer avanserte komposittløysingar til maritim sektor, havbruk, energi og landbasert industri.
