H2 Hardanger opna nytt avdelingskontor

Frå 1. juni er H2 Hardanger etablert med avdelingskontor i Brynaskogen 25 på Voss, som ligg i eit etablert næringsområde. Selskapet har frå før hovudkontor i Norheimsund.

Fire nye tilsette byrja på Voss 1. juni. Desse var tidlegare ansvarlege for prosjektering i Tecno VVS AS. Med desse vert seks tilsette knytte til avdelingskontoret, som Tor Bakketun skal leia. Det opplyser dagleg leiar Håkon Hjartnes til HF.

Verksemda opplyser i ei pressemelding at etableringa på Voss skal gjera henne meir tilgjengeleg for kundar, prosjekt og samarbeidspartnarar i regionen.

Kontoret skal arbeida tett saman med hovudkontoret. Saman skal dei tilby tenester innan prosjektering og prosjektadministrasjon.

I samband med etableringa har H2 Hardanger styrkt organisasjonen med nye tilsette. Selskapet får utvida kompetanse innan «RIV-prosjektering», som omfattar rådgjeving og prosjektering av varme-, ventilasjons- og sanitæranlegg.

– Dette gjev oss høve til å tilby eit meir komplett tverrfagleg tilbod, ta større ansvar i prosjekta og levera meir heilskaplege løysingar til kundane våre, skriv selskapet.

Hjartnes opplyser at selskapet ynskjer å vera ein verdfull samarbeidspartnar for byggje- og utviklingsprosjekt i Hardanger og på Voss.

Samla har H2 Hardanger 13 tilsette, opplyser dagleg leiar Håkon Hjartnes. I november vart seks tilsette skilde ut i selskapet i ADQ Aqva, som satsar spesifikt på tenester retta mot akvakultur.

Båe selskapa er åtte av QFlow Grup AS i Malmø, som kjøpte H2 Hardanger våren 2024.