Godt vinterferievêr fleire stader i landet

Denne veka er det vinterferie fleire stader i landet. I høgda ser det ut til at skiføret er godt, samtidig er det varsla fare for snøskred på Vestlandet.

– Tysdag kveld kjem eit nedbørsområde med mildluft inn mot Vestlandet. Onsdag blir det både vind og regn i låglandet vest i Sør-Noreg. I fjellet blir det snø, men vindfullt og mildare, opplyser Meteorologene på Twitter.

Langs kysten og i låglandet er det varierande snøforhold. Eit stykke opp i terrenget er sjansen for gode skispor stor, men tysdag kveld blir det mildare.

Noregs vassdrags- og energidirektorat (NVE) har sendt ut oransje farevarsel, altså betydeleg snøskredfare, gjeldande for måndag til og med onsdag.

Områda det er snakk om, er Trollheimen, Romsdal, Sunnmøre, Indre Fjordane, Voss, Hardanger og Heiane (fjellområda i Indre Rogaland, Agder).

For dei fleste områda er det oransje varselet alle tre dagar, medan det er innslag av gult for Indre Fjordane (tysdag), Jotunheimen (måndag, tysdag), Indre Sogn (måndag, tysdag) og Heiane (måndag).

Frå onsdag ettermiddag til torsdag ettermiddag er det venta mykje snø i fjellet i Vestland og Nord-Rogaland. Meteorologane meiner det kan komme mellom 30 og 50 centimeter på eit døgn. Samtidig blir det regn under 600 meter over havet onsdag ettermiddag. I samband med dette er det sendt ut gult farevarsel.

(©NPK)