Dei tre hjelpekorpsa med base på Kvamskogen – Norheimsund, Bergen og Arna og Åsane – er klare for å yta ulønt påskeberedskap. Fredag vart det markert med kickoff ved hytta til Norheimsund Røde Kors Hjelpekorps.

Fyrte av startskotet for beredskapspåsken: – Pakk meir enn du treng!

Pandemien gjorde det ikkje lettare å rekruttera til Raudekrossen, men fjellturistar i Kvam vil likevel vera i mange gode hender om uhellet skulle vera ute i påsken.

– Det har eigentleg vore heilt umogeleg. Me har slite enormt med å rekruttera nye, men har fått inn nesten ti nye i vår og fått dei i gang. Så me håpar å halda dei varme, seier leiar Ingeborg Steine Jensen i Norheimsund Røde Kors Hjelpekorps (NRKH).

Denne helga arbeider ho med å få fylt opp vaktlistene i hytta kloss i fylkesvegen ved Kvernavollen i påsken; målet er å ha fire på vakt heile tida. Skulle ho ikkje lukkast fullt ut, finst ei viss trøyst i den korte vegen mange av dei andre NRKH-lemene har til «skogen».

Artikkelen held fram under annonsen.

Gjennomgåande utfordring

Fredag inviterte Hordaland Røde Kors Hjelpekorps til ei lita markering – eit kickoff – av startskotet for påskeberedskapen. Hordalandsbenken på Stortinget var invitert, men berre Ove Trellevik (H) og Silje Hjemdal (Frp) dukka opp. Premien var mellom anna pølser, kaffi og ein snøskutertur, pluss mykje nyttig kunnskap om verksemda til den frivillige organisasjonen. Alt vart servert i strålande sol, som beredskapssymbolsk var erstatta med snøbyer litt seinare på dagen.

Stortingsrepresentant Silje Hjemdal (Frp) fekk sitja på med snøskuter for fyrste gong i livet, med Frank Jacobsen som stødig førar.

Erlend Håheim, seksjonsleiar for hjelpekorps i Hordaland, orienterte om påskeberedskapen og førebuingane til høgtida. I Hordaland er kring 100 av 540 godkjende lemer i beredskap, pluss kring like mange i heimeberedskap. Med andre ord stiller mange gratis opp for at eg og du skal kunna kjenna oss trygge når me ferdast til sjøs, til fjells eller andre stader.

Håheim fortalde at det slett ikkje er berre i Kvam organisasjonen har slite med rekruttering som fylgje av pandemien og ymse kursrestriksjonar. Mange har slutta og ikkje vorte erstatta av nye, slik at talet på godkjende lemer har minka. Dei som er med, må nemleg sertifiserast kvart tredje år for å få vera operative.

Innføring av naudnettet og nasjonale rettleiarar for søk var store framsteg for både Raudekrossen og naudetatane, ifylgje Erlend Håheim. Han er spent på omfanget av årets påskeutfart og på korleis to år med pandemi slår ut.

Vona er at det skal ta seg opp att når aktiviteten aukar att. Jensen forstår ikkje kva som er så vanskeleg med å melda seg til teneste, sjølv om det vel å merka krev at ein er villig til å ofra ein del tid utan å få betaling for henne.

– Det er veldig kjekt, sosialt og lærerikt. Ein kan spesialisera seg på mange felt. Ein hobby som passar for dei fleste, reklamerer NRKH-leiaren skamlaust.

Å vera med i Raudekrossen er både kjekt og lærerikt, forsikrar Ingeborg Steine Jensen.

– Pakk meir!

Vêr og føre er avgjerande for kor mange som er på tur og kor langt dei går – og dermed for risikoen for redningsoppdrag. I påsken i fjor hende praktisk tala ingenting dramatisk i Kvam. I år er det meldt litt ymse vêr, men ein del sol mot påskehelga.

Jensen vågar ikkje å spå om korleis høgtida vert, og kan knapt tillata seg å kryssa fingrane for meir «action». Med tanke på rekruttering er det likevel ein føremon at medlemene får nytte av det dei ofrar fritid for å læra, påpeikar ho.

Leiaren manar folk som skal på tur, til å ta med seg litt meir enn dei i utgangspunktet treng, det vera seg klede, mat eller anna utstyr, og dimed ta høgd for å vera på tur lenger enn planlagt. Utstyret i dag er så godt at det skal mykje til for at det skal gå gale – dersom det berre er med på turen, seier ho.

Artikkelen held fram under annonsen.

– Er det slik at me skal bera med oss utstyr til skredsøk på nær sagt alle turar?

– Det vil eg seia. Me har ikkje sjanse til å nå fram tidsnok, så det beste er kameratredning. Om ein i nærleiken har skredsøkjar, og vedkomande som vert teken av eit skred, har ein, er det store sjansar for å verta funnen raskt, seier Jensen, som minner om at ein søkjar, ei søkjestong og ein spade i dag knapt veg noko.

Fjellvitreglane

1. Planlegg turen og meld frå kvar du går.

2. Tilpass turen etter evne og forhold.

3. Ta omsyn til vêr- og skredvarsel.

4. Ver budd på uvêr og kulde, sjølv på korte turar.

5. Ta med turvande utstyr for å kunna hjelpa deg sjølv og andre.

6. Ta trygge vegval. Gjenkjenn skredfarleg terreng og usikker is.

7. Bruk kart og kompass. Vit alltid kvar du er.

8. Vend i tide, det er inga skam å snu.

9. Spar på kreftene og søk ly om naudsynt.

– Signal: Tenk!

Ove Trellevik rosa dei frivillige for innsatsen og engasjementet. Dei gjev tryggleik for dei som ikkje er røynde i fjellet og på sjøen, og sender samstundes ut nyttige signal til folk om å utøva sjølvjustis og tenkja seg om før dei gjev seg i kast med farar.

– Det er sikkert mange som legg ut på langtur eller køyrer der dei ikkje burde. Kunnskap er avgjerande. Det er nok ein Roald Amundsen i mange: «Bak den toppen der har ingen vore før meg», sa Trellevik.

Leiar Ingeborg Steine Jensen (t.h.) i Norheimsund Røde Kors Hjelpekorps og andre frivillige fekk ros av stortingsrepresentant Ove Trellevik (H). Jensen skal i år mellom anna ha påskevakt på informasjonssentralen som fører skadestatistikk. Den vakta tek ho på lagshytta, for vakta kan utførast på «heimekontor».

– Det er av og til ein sit på hytta og tenkjer «ja, ja, folk skal ut i dag òg ja». Du har dei som er uheldige og dei som overdriv og strekkjer strikken for langt. Det er med dei siste me gjerne får dei mest krevjande situasjonane. Då kan også vår kompetanse koma til kort, sa Håheim.

– Me har tenkt før at det kan verta ein roleg påske, men ein veit aldri kva som skjer, sa Einar Irjan Ananiassen, som er seniorrådgjevar i Norges Røde Kors.

Seniorrådgjevar og «internjournalist» for dagen, Einar Irjan Ananiassen, minte om at det er meir enn brotne bein og kuttskadar som kan oppstå i fjellet. Til dømes kan magesjuke råka. Til høgre står seksjonsleiar for hjelpekorps i Hordaland, Erlend Håheim.