Fyrst krympa gruppa. Så vart ho vengjeklipt.

Eit framlegg som Sp tok initiativ til, fekk nær full støtte då kommunestyret handsama saka onsdag 18. juni. Berre R røysta mot.

Framlegget går ut på å droppa den rådmannstilrådde styringsgruppa og i staden peika ut ei referansegruppe med éin representant for kvart parti. Også innstillinga frå hovudutval for kultur og levekår, om å plassera eit representativt tal på medlemer frå utvalet i ei styringsgruppe, vart forkasta av det øvste politiske organet.

Randi E. Oppedal (Sp) meiner at alle parti bør få delta i prosessen, og viste til at det uansett skal vera kommunestyret som sit med det politiske ansvaret.

Også rådmann Ole-Jørgen Jondahl gjekk god for framlegget, og sa at det i større grad enn hans eige framlegg i saka vil sikra eit skilje mellom politikk og administrasjon. Dette skiljet er eit tydeleg krav i kommunelova, noko som set ein stoppar for ymse grupper der både folkevalde og byråkratar er medlemer. Jondahl tok sjølvkritikk for å ha nytta omgrepet «styringsgruppe».

Alle parti så nær som R stilte seg bak eit framlegg om at rådmannen skal sjå på barnehagestrukturen, mogelegheiter for oppvekstsenter og skulefritidsordninga parallelt med skulestrukturen. Årsaka er at desse felta heng tett saman med skulestrukturen, påpeika Tor Helge H. Tjemsland (Ap).

Ifylgje vedtaket skal referansegruppa og ei administrativ arbeidsgruppe ha dialog med ibuarane for å sikra god involvering. Framlegget om ny skulestruktur skal vera klart i andre kvartal neste år.

R føreslo å gå mot skulebruksplanen og å påleggja rådmannen å greia ut korleis kommunen kan styrkja tilflyttinga og rekrutteringa i skulekrinsane. Det siste framlegget vert det ikkje eingong røysta over, ettersom ordførar Roald Aga Haug (Ap) nytta retten til å avvisa framlegget. Han meiner at det ikkje har noko med skulestrukturen å gjera.