Full stans i taksering av pelsdyrgardar

Det er full stans i taksering av norske pelsdyrgardar. Noregs Pelsdyralslag vil ha hastemøte med departement og direktorat.

Det skriv avisa Nationen.

– Taksatorar har avlyst avtalar med fleire bønder om at det er full stans i all taksering, noko vi tidlegare i dag også har fått stadfesta frå Norsk Landbrukstakst, seier kommunikasjonssjef i Noregs Pelsdyralslag, Guri Wormdahl, til avisa.

I juni 2019 vedtok Stortinget lovforbod mot hald av pelsdyr, og at dei pelsdyroppdrettarane skulle få kompensasjon. I mai 2021 vart det vedteke at det skulle givast full erstatning, og vedtok at fleire kunne ha rett på erstatning. Den vedtekne regelendringa tredde i kraft mars 2022.

Pelsdyralslaget er lite imponert over beskjedane som medlemmene no har fått.

– Bøndene gir uttrykk for enorm fortviling. Bøndene er i sjokk. Dei har venta i snart fem år. Mange bønder har hatt besøk av taksatorar, og har brukt mykje tid og krefter på å førebu seg for å sikre eit korrekt faktagrunnlag for takstane. Sjølv om taksatorane kom seint i gang, har dei gjort ein svært grundig jobb, seier Wormdahl.

Tysdag formiddag sende NPA eit brev til Landbruks- og matdepartementet og Landbruksdirektoratet. Dei ber om eit hastemøte.

(©NPK)