Snart gratis i Jondalstunnelen
Framstegspartiet og regjeringspartia har vorte samde om å avvikle fem bomstasjonar. Bompengane i Jondalstunnelen vert snart historie.
– Ei gledeleg dag. No ser det ut til at ferjeopprøret har verka, seier Frode Nygård (Frp), varaordførar i Kvam, i ei pressemelding frå Frp.
Frp gjekk i utgangspunktet inn i forhandlingane om revidert nasjonalbudsjett med krav om ein bompengefri sommar i Noreg. Det fekk dei ikkje gjennomslag for.
Artikkelen held fram under annonsen.
Men bompengekutt vert det. I staden for å innføra bompengepause i ferien er partia samde om å løyva 596 millionar kroner til nedskriving av bompengegjeld. Det tyder at fem bomstasjonar kan avviklast:
• Fylkesveg 107 Jondalstunnelen i Vestland
• Fylkesveg 48 Årsnes Ferjekai og Løfallstrand–Årnes i Vestland
• Riksveg 80 Rørvika–Strømsnes i Nordland
• Fylkesveg 64 Atlanterhavstunnelen i Møre og Romsdal
• Fylkesveg 33 Skreifjella–Totenvika i Innlandet
Dei fem bomstasjonane vert gratis å passera frå seinast 1. juli.
– Eg hadde forventa at dei skulle gjera noko med dette, då regjeringa stilte med sveleetande statsrådar på ferjetur i febuar, seier stortingsrepresentant Helge André Njåstad (Frp).
Artikkelen held fram under annonsen.
Det vert i revidert nasjonalbudsjett løyvt 150 millionar kroner til ferjefylka for å kompensera for kostnaden krava om lågutsleppsteknologi medfører. 100 av millionane skal fordelast ut frå kva ferjesamband som har teke i bruk elferje i 2020.
Før koronapandemien kom det sterke protestar mot prisveksten på fylkeskommunale ferjesamband.
