Fleire utlendingar vitjar Vinter-Noreg
I år har det komme 39 prosent fleire vinterturistar samanlikna med same periode i 2023.
Til saman 2 156 929 utanlandske overnattingar vart registrerte i Noreg mellom januar og mars i 2025, viser tal P4 har fått frå Statistisk sentralbyrå. Det er ein auke på 39 prosent samanlikna med dei same månadene i 2023.
I 2024 var talet 1 904 300, og i 2023 var det 1 552 602.
Annonse
I Innlandet vart det registrert over 250 000 utanlandske overnattingar dei tre første månadene i år. Mange av turistane kjem for å stå på ski.
Alpinco, som eig og driv fleire store skianlegg, opplyser at selskapet har dobla omsetninga samanlikna med tida før koronapandemien.
– All veksten kjem stort sett frå utanlandsmarknaden, seier marknadssjef Espen Stensvold Rønning.
Ifølgje selskapet er halvparten av gjestene deira utlendingar, turistar frå Danmark, Sverige og Storbritannia trekkjer fram svak norsk krone, stabile snøforhold og frykt for dårlegare snøvintrar i åra framover som viktige grunnar til at dei vel Noreg.
Annonse
Fleire beskriv òg Noreg som eit meir barnevennleg og rimelegare alternativ enn Alpane.
(©NPK)
