Fjerna blomestativ frå HC-parkering etter årevis med kritikk

Rema 1000 har i fleire år brukt ein parkeringsplass for rørslehemma til blomesal om sommaren. No har butikken flytta stativa.

Tor Eirik Thorsen boikottar butikken. Han har ei dotter som har behov for HC-parkering. Han har i årevis engasjert seg i saka, og har mellom anna skrive brev til Kvam herad, skrive lesarinnlegg i HF og vore i kontakt med butikken. I vår sende han brev til Rema 1000 sentralt for å få butikken til å endra praksisen.

HF tek kontakt med Thorsen etter å ha fått tips om at blomestativa igjen okkuperer HC-plassen.

– Omsynet til rørslehemma må respekterast. Dette er diskriminerande. Det er tydeleg at det er skilnad på Æ- og B-kundar, seier han.

Han legg til at HC-plassane ofte vert misbrukte av sjåførar som ikkje har rett til å bruka dei.

Paragraf 61 i parkeringsforskrifta slår fast at vilkårsparkeringsplassar som er tilgjengelege for allmenta, skal ha minst to plassar som er reserverte for forflyttingshemma.

Flytta blomane

Kjøpmann Lars Åge Berge i Rema 1000 Norheimsund fortel at butikken har plassert blomestativa ved inngangen av praktiske årsaker. Det er lite føremålstenleg å setta dei ein annan stad, seier han. Han påpeiker at éin plass framleis er ledig sjølv om den andre er oppteken, og at blomesalet gjeld ein avgrensa periode på fem–seks veker i året. Samstundes påpeiker han at Rema 1000 sine HC-plassar er like ved inngangen, medan andre butikkar har større avstand til HC-plassane.

Når HF først tek kontakt med Berge, gir han ikkje uttrykk for at han vil flytta blomestativa før salet er ferdig. Kort tid etter tek han kontakt for å fortella at dei er flytta likevel.

– Me ønsker å ta omsyn, og me såg ei løysing som me ikkje har sett før. Me har eit ansvar som me ønsker å ta, seier han.

Hyllene er no skyvde til sides, vekk frå HC-plassen og nærare inngangen til leilegheitene som er i same bygget. Berge trur ikkje at han kjem til å selja færre blomar som følge av flyttinga.

Berge seier at det hender at han ser gjester utan HC-bevis misbruka dei reserverte plassane, men han meiner omfanget er lite.

– Stort problem

Guri Anne Nesdal Egge, regionleiar i Noregs Handicapforbund (NHF) sørvest og sentralstyremedlem i NHF, seier at det er ei vanleg problemstilling at butikkar blokkerer eigne HC-parkeringsplassar. Om sommaren er det vanleg å møta på blomestativ. Om vinteren er plassane gjerne dekte av snø, seier ho.

– Det er eit stort problem for oss. Det er ikkje berre for moro me har desse parkeringsplassane. Dei står nær inngangen av ein grunn, seier ho.

Ho håpar tankeløyse er grunnen til at problemet er utbreitt, og fortel at rørslehemma ofte slit med å få respekt for utfordringane sine.

– Det er vanskeleg. Eg trur det handlar mykje om manglande kunnskap. Det er viktig å setta søkelys på temaet, seier ho.

Arild Birkenes i NHF sørvest fortel at det ikkje finst juridiske sanksjonsformer å bruka mot verksemder som bryt med parkeringsforskrifta, men at dei fleste verksemder vert forlegne og endra praksis når brot vert påpeikte.

Ikkje åleine

Heidi Marit Seim er medlem i rådet for menneske med nedsett funksjonsevne og eldre i Kvam. Ho seier at temaet framkomst og universell utforming er eit gjentakande problem fleire stader. Rådet har ved fleire høve oppmoda næringsdrivande i sentrum om å passa på fri ferdsle for alle grupper, anten det gjeld parkeringsplassar eller fortau.

– Dei fleste kjenner nokon som er svaksynt eller sit i rullestol og kan ha vanskar med å komma seg forbi gjenstandar på fortauet. Det er viktig å minna kvarandre på problemstillinga. Det handlar om å tenka på andre enn dei som kan springa fritt. Det skal vera rom for alle, seier ho.