Firedobling i talet på redningsoppdrag for Røde Kors
Sidan 2007 har det vore ei firedobling i talet på redningsoppdrag som Røde Kors har delteke i.
– Vi ser ein auke av oppdrag på stader med dei kjende turistmåla i høgfjellet og dei litt meir utfordrande gåturane, seier Jarle Bjørge Øverland, nestleiar i Landsråd Røde Kors Hjelpekorps, til NRK.
Medan det i 2007 vart gjennomført 196 redningsoppdrag, var talet oppe i 868 i fjor.
Artikkelen held fram under annonsen.
Landsrådsleiar Kjersti Løvik trur årsaka til auken rett og slett er at fleire gir seg ut på tur no samanlikna med tidlegare.
– Det blir lagt meir til rette for friluftsliv, det er meir turstiar og meir fokus på helseeffekten av å vere ute. Og då skjer det meir ulykker ute, seier ho.
Røde Kors ber folk vere nøye med førebuingar og planlegging før ein skal ut på tur. Noko som effektivt kan minimere risikoen for eit uhell, er rett fottøy. Røde Kors fortel at dei mellom anna har henta folk på tur med crocs på føtene.
(©NPK)
