Det er fullt mogleg å ta seg ein halvliter i sola, men ved midnatt stengjer kranene. Fornuftig, meiner FHI. Foto: Stian Lysberg Solum / NTB scanpix / NPK

FHI: – Fornuftig med skjenkjestopp

Folkehelseinstituttet (FHI) stiller seg fullt og heilt bak vedtaket om at utestader over heile landet må stengje alkoholserveringa ved midnatt.

– Vi meiner regjeringsvedtaket er fornuftig frå eit smittevernsynspunkt, seier overlege Preben Aavitsland i FHI til NTB.

Han viser til mange meldingar om at avstandsreglane i delar av serveringsbransjen, særleg pubar og nattklubbar, ikkje blir følgde.

Artikkelen held fram under annonsen.

– Det ser ut til at publikum gløymer råda, og «forgløyminga» blir gjerne verre utover kvelden. Vi frykta at situasjonen kunne forverre seg når det blir kaldare i vêret og meir av utelivet føregår innandørs, grunngir han.

Noka oversikt over kor mange som har vorte koronasmitta på utestader, finst likevel ikkje.

– Det er ikkje lett å måle. Men vi veit at mange smitta frå dei siste vekene har vore på skjenkjestader, til dømes i Indre Østfold og Oslo, seier Aavitsland, som minner om at mange nordmenn truleg vart smitta på utestader i Austerrike i vinterferien.

Kva verknad tiltaket vil ha, er òg vanskeleg å seie, medgir han.

– Poenget er å ha mange tiltak som kvar reduserer risikoen litt slik at vi held epidemien under kontroll.

Som følgje av skjenkjestoppen vart det i helga meldt om ei rekkje heimefestar og større samlingar av feststemde utandørs.

– Smittevernteknisk er det betre at folk samlar seg utandørs enn innandørs, og at ti personar samlar seg til nachspiel enn hundre på puben, seier Aavitsland.

(©NPK)