Festival trassa uvêret

– Det var skikkeleg stress i går, seier festivalleiar Marit Buttingsrud rett etter festivalopninga laurdag føremiddag.

Ho fortel at ho sjekka vêrmeldinga kvar time fredag, men at festivalstyret bestemte seg for å gjennomføra arrangementet. Alle arrangementa fredag kveld var utselde.

Til marknaden laurdag fekk dei produsentane som ynskte det, lov til å flytta innandørs.

– Det er trist at kjøpesenteret står tomt, men det var ein fordel for oss i dag, for då kunne me hiva oss rundt og flytta skjenkeområdet inn. Det vart koseleg, seier Buttingsrud.

Ho fortel at mange spurde etter Ekta Skåramat, som var éin av fleire produsentar som måtte halda seg heime. Uvêret «Amy» hadde rive ned tre og stengt vegar. Andre produsentar vart seinka fordi dei måtte køyra omvegar, men mange var klare til å selja produkta sine då festivalmarknaden opna.

Inne kunne ein mellom anna kjøpa kaffi, honning, keramikk, panneband og epleslush. Det krydde av folk i buene allereie før klokka 11. Livoglyst-gjengen selde mellom anna saft, vaflar og bollar i kafeen. 

Fotballforeldre på tur

Rundt eit bord inne i skjenkeområdet sat ein gjeng frå Olsvik. Charlotte Faaberg-Johansen fortel at dei var på festivalen for fyrste gong. Fellesnemnaren for gruppa er at dei har 16 år gamle gutar som har spela på same fotballag. I haust byrja gutane på vidaregåande, og vart spreidde på fleire skular.

Då laget var på Norway Cup, sat foreldra ute og drakk sider. Dei bestemte seg for at sjølv om gutane ikkje lenger skulle spela fotball i lag, kunne foreldra halda kontakten.

Marita Onarheim kjem frå Øystese, men bur i Olsvik. Ho seier at forskjellen på å bu i byen og bygda er kvar ein har nettverket. På bygda møter ein til dømes gamle klassekameratar, medan ein i byen må finna nettverket andre stader, til dømes på fotballbana, forklarer ho.

– Sidan dette er siste ungen, bestemte me oss for at me i alle fall kan halda på foreldrenettverket, seier Onarheim.

Såg glade kalvar

Fleire reisemål vart vurderte, mellom anna Ulvik. Då kom Onarheim på at heimbygda kunne freista med eigen siderfestival. Foreldra realiserte ideen og bestilte hotell. 

Laurdag fekk gjengen med seg kalvemønstringa. Charlotte seier at ho aldri har vore med på noko liknande.

– Det var kjekt. Eg vart veldig fasinert! Kalvane var berre éin månad gamle! seier ho.

– Dei var kjempeglade og hoppa rundt med alle beina i lufta samtidig, skyt Helene Eide inn.

– Ei heil verd

Fotballforeldregjengen var blant dei fyrste som vitja skjenkeområdet. I glaset hadde dei ulike variantar av sider.

– Det er kjekt med sider som smakar noko. Det er ei heil verd med sidrar, seier Charlotte.

Ho fortel at ho har vore med på ei sidersmaking med pommelier Thomas Digervold i Bergen. Då vart ho inspirert til å prøva sider til ulike typar mat, til dømes til pinnekjøt. 

– Digervold spurde: «Kvifor drikk me så mykje prosecco når me har så mange gode sidrar?» Det er spanande med det norske, og det er viktig å støtta lokale produsentar, seier ho.

Thor-Willy Faaberg-Johansen konkluderte med at sideren var både for syrleg og for søt, og måtte i baren for å fylla glaset med mørkt øl.

Resten av dagen skulle gjengen spasera rundt i marknadsområdet, eta pizza på Øvreviken Pizzeria og avslutta kvelden med sosialt samvær på siderfesten. 

Sidersuksess

Den offisielle opninga stod ordførar Torgeir Næss for. Han snakka om historia til sideren, og sa at historia er grunnfjellet sidersuksessen byggjer på. I siderkonkurransen er det dette grunnfjellet som vert trekt fram, sa han.

– Her kan alle, bortsett frå proffane, få produktet sitt vurdert og nokon premiert. Dette er ei folkelegheit på sitt beste, sa ordføraren.

– Godt fyrsteinntrykk

I buene utandørs kunne ein finna mellom anna bilar, båtmotorar, firhjuling, snøfresar, blomeløk, bukettar, kjøt og eigedomsmeklarar.

Ved Spildegarden si bu stod Marianne Kaland-Riddergård. Ho kjøpte nysteikte lappar. Familien frå Lindås hadde lånt ei Equinor-firmahytte hjå Hardanger Fjordhytter på Laupsa, og tok turen til Øystese sentrum for å prøva festivalen.

– Fyrsteinntrykket er veldig bra! Aksel vil ri på ponni, og så må me smaka på sider. Svelene er me allereie godt i gang med, seier ho. 

– 10 av 10

I ei bu lenger borte stod Torgeir Kristian Børve og steikte ost. Han seier at steikjeosten frå Hardanger Bygdeysteri er eit vegetarisk tilbod laga av lokal kumjølk. Det var kø i burgarbua før klokka var 11.

– Tidspunktet er aldri noko hinder for å få ein god burgar, seier Børve.

Aodne Aalvik og Marcus Skeie Eikeland hadde tennene godt planta i kvar sin nachosburgar då bladfyken var innom standen.

– Han var veldig god, seier Marcus.

– 10 av 10! meiner Aodne.

Du kan sjå fleire bilete frå festivalen her: