Får KI-hjelp på tannklinikken

Det opplyser Vestland fylkeskommune i ei pressemelding. Alle tannklinikkane får tilgang til et nytt KI-verktøy som skal hjelpa dei med å analysera røntgenbilete. Vel å merka skal verktøyet ikkje erstatta tannlækjarane.

– Dette er eit kjekt og nyttig hjelpemiddel. Men me må heile tida vera bevisste på at det er eit supplement, ikkje ei erstatning for fagkunnskap, seier Dorte Grønsberg, klinikkleiar ved Sogndal tannklinikk.

Klinikken har, saman med klinikkane i Loddefjord og på Nesttun, testa verktøyet sidan 15. oktober. Prosjektet er kome i stand i samarbeid med seksjon for informasjons- og kommunikasjonsteknologi i fylkeskommunen.

Namnet på verktøyet er «Second Opinion» og skal gje nettopp ei «second opinion» – ei ekstra vurdering – etter at tannlækjaren har vurdert saka manuelt. Analysen tek berre 30–40 sekund og resulterer i rosa og grøne fargefelt der KU «mistenkjer» høvesvis karies eller tannstein. I tillegg er verktøyet godt eigna til å visa beinnivå.

Ifylgje Grønsberg må bileta tekne frå rett vinkel og med rett stråledose for at verktøyet skal fungera godt. I tillegg vert ikkje karies på tyggjeflata oppdaga så lett.

– Men han er flink til å fanga opp karies på tidleg stadium, grad 1, som me ikkje alltid ville ha sett med det blotte auga. Det er ikkje noko me behandlar, men det gjev eit betre bilete av tannhelsa til pasienten over tid, fortel klinikkleiar Grønsberg, som understrekar at KI aldri skal vere ei sovepute eller erstatta fagleg dialog mellom kollegaer.

Bileta som vert sende til analyse, er anonymiserte og kan ikkje sporast til pasientar.

Alle klinikkane har fått tilgang til KI-verktøyet og er kursa i bruk. Prøveperioden varer i ein månad, og erfaringane skal samlast inn for å vurdere vidare bruk.