Sette i gang leiteaksjon etter funn av vasskuter

Naudetatane leitte laurdag morgon etter sjåføren av ein vasskuter som dreiv i fjorden.

Føraren var i god behald, fortel operasjonsleiar Steinar Hausvik i Vest politidistrikt.

Politiet fekk inn fleire meldingar om ein vasskuter som dreiv i sjøen ved Norheimsund. Det første tipset kom rundt klokka 07.

Skuteren viste seg å vera varm, og ein mistenkte då at sjåføren hadde falle i sjøen. Naudetatane sette i verk ein større leiteaksjon, og både luftambulansen og eit Sea King-helikopter kom til området.

I vasskuteren fann ein eit telefonnummer. Det tilhøyrde eigaren, som var i god behald. Eigaren meiner at skuteren må ha kome på rek som følge av dårleg fortøying.

Aksjonen vart avslutta rundt klokka 8.30.