Fall mange meter saman med ATV
Ein ATV-førar køyrde over muren langs vegen og fall minst seks meter i Øystese måndag kveld.
Publisert
Sist oppdatert
Ulukka hende på «gamlevegen» på Børvenes. Meldinga kom til politiet klokka 20.33.
Føraren skulle vera oppegåande etter hendinga, melde operasjonsleiar Jan Børge Misje i Vest politidistrikt i Politiloggen klokka 20.44. Sidan melde politiet at føraren vart vareteken av helsevesenet.
Annonse
Politioverbetjent Ann May Skeistrand Garen seier til HF at føraren fall utfor saman med køyretøyet. Han var åleine på ATV-en, men køyrde i fylgje med andre. Han vart rutinemessig frakta til traumemottaket ved Haukeland universitetssjukehus.
– Det ser ut til å gå veldig bra, seier ho.
To vitne som såg hendinga, vert avhøyrde. Politiet opprettar rutinemessig sak, sidan det var ei ulukke med personskade.
Alle naudetatane rykte ut. Bergingsbil vart tinga. Ifylgje Garen må Jan Mo AS hjelpa til med kranbil for å få ATV-en opp att.
