Jondal har tradisjon for sommaropen kyrkje, men ikkje alle set pris på ulåste gudshus utan tilsyn.
Sigbjørn Linga
Drøfta open kyrkje i Jondal: – Truleg ikkje stor tilstrøyming
Fellesrådet vedtok i møtet 18. mars å be kyrkjeverja å freista leggja til rette for sommaropne kyrkjer i Jondal, Utne, Kinsarvik, Ullensvang og Odda. Rådet fastsette ramma for ordninga til 900 arbeidstimar og kring 200.000 kroner.
Kyrkjene og sokna i Ullensvang kommune har hatt ulike ordningar for opne kyrkjer i sommarmånadene, og dei stammar frå tida før kommunesamanslåinga i 2020. Det opplyser kyrkjeverje Oddbjørn Vestbøstad i saksutgreiinga.
I Jondal, til dømes, har kyrkja vore open utan tilsyn på dagtid. Vel å merka har verdisaker vore låste inne og berre sjølve kyrkjerommet vore ope. Soknerådet og tilsette har på dugnad opna og stengt kyrkja.