Brot i kommuneoppgjeret – streikefare i slutten av mai

Viss partane ikkje blir samde om ein avtale, blir det streik i kommunesektoren i slutten av mai. Ei lang rekkje arbeidsplassar kan bli ramma – både skular, helsevesen, kulturliv, brann- og redning og teknisk personell.

– Me er overraska og skuffa over den manglande viljen til arbeidsgivarane til å komma oss i møte. Det var ikkje grunnlag for vidare forhandlingar fordi KS ikkje ville innfri krava våre om lønn og andre vilkår, seier Helene Harsvik Skeibrok, leiar i LO Kommune.

LOs hovudkrav er auka kjøpekraft til alle og utjamning av lønnsforskjellane.

– Me har stilt eit tydeleg krav om at heile laget av tilsette i kommunesektoren skal få betre råd. Dette kravet firar me ikkje på, seier Skeibrok, som også er leiar av Fagforbundet.

– Ingen å mista

Arbeidstid har også vore eit av hovudtemaa i forhandlingane.

YS Kommune jobbar for ein heiltidskultur og høgare tillegg for ukomfortabel arbeidstid. Dei meiner KS vil svekkja arbeidstidsordningane for dei tilsette.

– Det kan me ikkje vera med på. God organisering av arbeidstida er viktig for arbeidstakarane for å sikra meir heiltid og kvaliteten på tenestene. Det å ha ei arbeidstid det er mogleg å leva med, er avgjerande, seier Trond Ellefsen, som er leiar i YS-kommune og forbundsleiar i Delta.

Ellefsen påpeikar at i omstillingane kommunane står overfor, er dette heilt feil retning å gå. Kommunane treng betre rekruttering – og har ingen å mista.

– Grunnleggjande rettar

Også Unio , Akademikerne og Nito braut forhandlingane med KS torsdag. Avstanden er stor, seier Unios forhandlingsleiar Geir Røsvoll.

 – KS har vist svært liten vilje til å komma oss i møte på krava våre. I staden opplever me ein motpart som angrip grunnleggjande rettar som me har bygd opp over lang tid, seier Røsvoll.

– Tilbodet frå KS ville svekt rettane til arbeidstakarane og gjorde det umogleg for oss å forhandla vidare, seier leiar i Akademikerne kommune Tonje Leborg.

– Det økonomiske tilbodet frå KS var ikkje godt nok. KS var heller ikkje villige til å komma arbeidstakarsida i møte på arbeidstidsordningar for lærarane. Det kan me ikkje godta, seier leiar Gro Gaarder i Nito Kommune.

KS: Treng hjelp

– Forhandlingane har vore komplekse, men konstruktive. Partane har strekt seg langt, men dessverre har det ikkje vore mogleg å finna ei heilskapleg løysing, slik at det no er behov for Riksmeklarens hjelp, seier KS’ forhandlingsleiar Tor Arne Gangsø i ei pressemelding.

Han seier det var arbeidstakarorganisasjonane som braut forhandlingane torsdag.

– Det felles målet til partane er ein sterk kommunesektor som sikrar gode tenester til innbyggjarane. KS har prøvd å finna ei samlande løysing med dei fire forhandlingssamanslutningane, innanfor ramma til frontfaget. Den må vera økonomisk berekraftig for kommunane, men også bidra til at kommunar og fylkeskommunar framleis er attraktive arbeidsgivarar, seier Gangsø.

Siste mai-helg

Meklinga hos Riksmeklaren startar 7. mai, med frist 28. mai. Dersom partane ikkje blir samde innan midnatt 28. mai, blir det streik i kommunar og fylkeskommunar frå fredag 29. mai.

– Ingen ønskjer streik, derfor håpar me å komma fram til eit resultat under meklinga. Likevel er streik er det kraftigaste verkemiddelet me har. Det vil me bruka dersom det må til for å fremja det rettferdige kravet frå medlemmene, seier LOs Skeibrok.

Lønnsoppgjeret i kommunesektoren (KS-avtalen) er Noregs største tariffoppgjer og omfattar tilsette i kommunane, fylkeskommunane og andre kommunale verksemder.

(©NPK)