Brefrontar over heile Noreg held fram med å gå tilbake

Målingar frå NVE i år viser at den varme sommaren både i nord og sør har ført til stor bresmelting, og dei fleste isbreane i landet endar med eit masseunderskot.

– Bresmeltinga sommaren 2025 den tredje største som er målt, seier Hallgeir Elvehøy, glasiolog i NVE, i ei pressemelding.

I Sør-Noreg var vintersnømengda på mange brear nær normal, med unntak av lågareliggjande brear på Vestlandet som fekk lite snø. Ein lang og varm sommar førte til mykje bresmelting, spesielt på dei lågareliggjande breane. Ålfotbreen i Nordfjord er ein av dei breane som ligg lågast i Sør-Noreg. Gjennom ein mild vinter kom mykje av vinternedbøren der som regn, og snømengda vart derfor berre to tredelar av normalen. På den austlege delen av Ålfotbreen var bresmeltinga gjennom sommaren den tredje største som er målt sidan målingane starta i 1986. Årets underskot er det nest største som er målt.

Målingar på andre brear i Sør-Noreg viste også stor bresmelting, og mange brear endar med eit masseunderskot i 2025. Satellittbilete frå tidleg på hausten viser at det ligg igjen ein del vintersnø på nokre av dei store breane og i nokre høgtliggjande område, men at svært mange brear har lite eller ingen vintersnø igjen.

NVEs brefrontmålingar i år viser at 33 av 37 målte brefrontar har smelta tilbake. Dei målte breane har på landsbasis i gjennomsnitt smelta tilbake 20 meter i år og 228 meter sidan 2015.

(©NPK)