Ber politikarane prioritere E16 mellom Bergen og Voss

Norges Lastebileier-Forbund (NLA) og NHO tranport og logistikk ber politikarane i Vestland om å prioritere ned Hordfast til fordel for ny E16 mellom Bergen og Voss.

– Det er ingen som døyr av å ta ferje, men det døyr faktisk folk på E16. Sånn kan vi ikkje ha det. E16 er for oss det desidert viktigaste prosjektet, seier Jan Ove Halsøy, regionsjef i NLA til NRK.

NHO Transport går i mot NHO sentralt, som meiner Hordfast bør prioriterast. Hordfast er vegprosjektet med å bygge ferjefri veg mellom Sunnhordland og Bergen, og blir vurdert til å ha stor lønnsemd for samfunnet, skriv kanalen.

Arbeidet med Nasjonal transportplan for 2022–2023 er no i gang. Vestland fylkeskommune skal gi innspel til prioriteringar i planen innan midten av mai.

Sidan 1990 har vegstrekninga på E16 kravd 41 menneskeliv.

– Vi ønsker tydelegheit i kva som er viktigast å prioritere. Frå vår side er det klart at E16 mellom Arna og Voss for augneblinken blir sett høgast på prioriteringslista, seier Gjert Meyer, styreleiar i NHO sin transportdel.

NPKredaksjon@hf.no