Ber om utgreiing av E134-arm

Stortingsrepresentant for Hordaland, Magne Rommetveit (Ap), etterlyser ei konseptvalutgreiing (KVU) for ein arm frå europaveg 134 til Bergen.

I eit skriftleg spørsmål til samferdsleminister Jon Georg Dale (Frp) skriv Rommetveit at behovet vert aktualisert i samband med andre utbetringar om omklassifiseringer på vegen.

Han påpeiker at det har skjedd mykje på vegen aust for Haukeli, men lite på vestsida.

- Sjølvsagt vil realisering av ein arm frå E134 til Bergen ligga eit stykke fram i tid, men ei KVU vil vera viktig for framtidig planlegging av denne, og ikkje minst for planlegging og dimensjonering av tunnelar over Haukeli og andre tiltak på E134, skriv Rommetveit.

KVU bør vurdera både Hordalandsdiagonalen og Sunnhordlandsdiagonalen, i tillegg til andre tenkelege løysingar, meiner han.