Her er det planlagt å byggja badstove, men då må reguleringsplanen endrast.
Eline Sandnes Fosse
Ber om endring for å få realisert badstove
Badstova skal etter planen byggjast på Tangerås, plassert innom landgangen til småbåthamna, ved naustet ved sandstranda. Ei førebels teikning syner ei badstove på om lag 25 rutemeter. Ho skal tilpassast rørslehemma og vera open for ålmenta.
Reguleringsplanen for småbåthamna vart vedteken i 2012. I føresegnene står det at området kan leggjast til rette med tekniske løysingar tilpassa rørslehemma, men utan varige, fysiske inngrep i eksponert fjell. I januar søkte Olav Sletvold på vegne av laugarlaget om ei endring.
Laugarlaget ynskjer å få med at området kan leggjast til rette med tekniske løysingar og badestove eller badestamp opp til 25 kvadratmeter tilpassa rørslehemma.