Avduka graffitikunst
Ordførar Torgeir Næss og nestleiar i Kvam ungdomsråd, Alexander N.N. Nitter, avduka laurdag eit graffitiverk i Norheimsund.
Kunsten er eit resultat av ungdomskonferansen Kvam herad arrangerte i fjor haust. I samband med konferansen hyra ungdomsrådet inn kunstnaren M.u. M Streetart. Heradet ynskte å lage eit kunstverk som alle deltakarane kunne vera med på.
Verket er hengt opp i Nedstegata. Ordet «SAMAN» er fylt med fargar og ord på ein himmelblå bakgrunn. Nitter seier han er nøgd med resultatet. Han tykkjer det er eit flott måleri med eit variert utval av stilar.
Annonse
– Ein ser at mange ungdommar har sett preg på det. Nokre har til og med skrive kvar dei kjem frå, seier Nitter.
Grunnen til plasseringa er at i Nedstegata er verket synleg og sentralt, fortel han. Han minner om at det er planlagt å gjera meir ut av Nedstegata, som gjerne heiter «Nistagato» på folkemunne.
Nitter seier at ordet «saman» kan bety mykje; tilhøyrsel, å kjenna seg inkludert og å vita at ein ikkje står åleine. Han meiner dette er viktig både på arbeid, på skule, på fritidsaktivitetar og i kvardagen. Ungdomsrådet var samd om at ordet passa til bodskapen.
– Me er sterkast når me er saman, slår Nitter fast.
Annonse
Valet av kunststil var ikkje tilfeldig. Ifylgje ungdomsrådsmedlem Markus Elias Fosse var målet å velja ei kunstform som treffer ungdommen. Slik landa ungdomsrådet på graffiti.
400–500 var med på konferansen. Nitter og Fosse trur om lag halvparten av dei bidrog til måleriet. Gutane legg til at deltakinga var frivillig. Av fleire «stasjonar» ungdomane kunne gå innom på konferansen, var kunststasjonen mest vitja, fortel dei.
