Pass ekstra godt på sykkelen din i desse dagar. Flest syklar blir stolne i dagane rundt skulestart. Illustrasjonsfoto: Berit Roald / NTB / NPK

August er den mest aktive månaden for sykkeltjuvane

August er den månaden i året der det blir stole flest syklar her til lands. Aller verst er det i dagane rundt skulestart.

I løpet av heile fjoråret vart 14.689 syklar melde stolne til forsikringsselskapa, ifølgje bransjestatistikk frå Finans Norge. Det er ein auke på 16 prosent frå året før, opplyser forsikringsselskapet If i ei pressemelding.

Den absolutte tjuveritoppen er i dagane rundt skulestart, viser ein analyse av sykkeltjuveri meldt til selskapet.

Artikkelen held fram under annonsen.

– Tala er i røynda fleire tusen høgare, fordi mange syklar med låg verdi ikkje blir melde stolne, verken til forsikringsselskap eller politiet, opplyser kommunikasjonssjef Sigmund Clementz i If.

August er månaden med gjennomsnittleg flest sykkeltjuveri, følgd av juni og september.

– Perioden 19. til 26. august peikar seg ut i tjuveristatistikken vår. Dette er dagar rett etter skule- og studiestart, og folk flest er tilbake til kvardagen etter ein sommar der det kanskje har vore lite aktivitet på sykkelen, seier Clementz.

Han seier at det er viktig med ein solid lås på sykkelen, men at dette ikkje alltid er nok for å skremme tjuven.

– Vêr klar over at vaierlåsar har lita motstandskraft mot verktøya sykkeltjuvane brukar. Bøyellåsar skapar som regel mykje meir bry for tjuvane, ofte så mykje at dei ikkje gidd å bruke tid på sykkelen din eingong, seier Clementz.

Av andre tips forsikringsselskapet gir mot sykkeltjuveri er å låse sykkelen med to ulike låssystem – då treng sykkeltjuven ulike verktøy. Det er òg smart å feste sykkelen i noko solid og fastmontert, skriv If.

(©NPK)