Åtvarar bilistar i Vest- og Midt-Noreg: – Vurder å la bilen stå!
I Vestland og Midt-Noreg melder Vegtrafikksentralen at det er stadvis svært glatt tysdag morgon. Har du skifta til sommardekk, bør du vurdere å la bilen stå.
– På grunn av låge temperaturar er det fare for svært glatte vegar i morgontimane. Det blir jobba med å salte på spesielt utsette strekningar, men på grunn av redusert vinterdrift vil fleire vegar kunne vere glatte og vi ber bilistar vurdere å la bilen stå dersom ein ikkje har vinterdekk, skriv Vegtrafikksentralen vest på X tysdag morgon.
Det har vore ei rekke større og mindre ulykker i løpet av natt til tysdag og tysdag morgon. Den alvorlegaste var ein front mot front-ulykke i Ålesund der ein person mista livet. Politiet seier det var glatt på staden, men har ikkje stadfesta at dette var årsak til ulykka.
Annonse
Yr har lagt ut farevarsel om at det kunne komme is og snø på Vestlandet, i Midt-Noreg og delar av Nord-Noreg tysdag.
(©NPK)
