600 millionar kroner blir fordelte på vegprosjekt over heile landet

600 millionar kroner er no fordelte på vegar over heile landet, som ein del av Stortingets tredje koronakrisepakke.

– Statens vegvesen har fordelt dette slik at alle delar av landet får midlar. Aust får 188 millionar, sør får 78 millionar, vest får 130 millionar, Midt-Noreg får 73 millionar, og Nord-Noreg får 132 millionar, seier samferdselsminister Knut Arild Hareide (KrF) til NRK.

Totalt vart det sett av 900 millionar kroner til samferdsel, 600 millionar av dette skulle gå til vegar.

Ifølgje ei pressemelding frå Statens vegvesen skal pengane i vest gå til følgjande:

• 22 millionea til ekstra asfalt

• Riksveg 15 Oppljostunnelen på Strynefjellet får oppgradering av elektrisk anlegg og lys

• Tiltak på tunnelar på riksveg 13 og E134 som er kortare enn 500 meter

• Montering av skrednett ved E16 Kluftafjelltunnelen.

Større aktivitet

Tanken med tildelinga er større aktivitet i bygg og anleggsbransjen og å gjere noko med vedlikehaldsetterslepet på norsk vegar.

– Vi har valt prosjekt der vi kan kome raskt i gang. Dette er oppdrag som passar godt små og mellomstore bedrifter, seier direktør Bjørn Laksforsmo i Statens vegvesen for drift og vedlikehald i ei pressemelding.

Av vegpengane går 500 millionar kroner til vedlikehald og tiltak for trafikktryggleik, medan 100 millionar kroner er sette av til meir asfalt på vegane.

Størst etterslep i nord og vest

Etterslepet på vegane er desidert størst i Hordaland, Sogn og Fjordane, Møre og Romsdal, Nordland og Troms, ifølgje NRK.

Pengane blir likevel fordelte over heile landet.

– På grunn av koronasituasjonen er det behov for meir aktivitet i heile landet, og derfor har vi valt å prioritere heile landet. Det er ikkje tvil om at det er enkelte regionar som har større utfordringar, og det vil kome fleire moglegheiter for oss til å handtere dei regionane spesielt, seier Hareide til kanalen.

Ber om oppgradering av fylkesvegar

I denne omgangen går pengane til riksvegnettet. Opplysningsrådet for Veitrafikken påpeikar at også fylkesvegane har eit stort vedlikehaldsetterslep.

– Det er 80 prosent større risiko for å døy på fylkesvegnettet enn riksvegnettet. Etterslepet er estimert til over 59 milliardar kroner, seier fagsjef Karin Yrvin til NTB.

Ho ber no fylka om å ikkje vere beskjedne i krava sine til Stortinget og regjeringa.

Eit kinderegg

– De presenterer eit kinderegg, ein får sett hender i arbeid, får rusta opp eit vegnett så det blir meir verdifullt, og det blir enklare å flytte menneske og gods, seier Yrvin.

Også KS krev at fylkesvegane får eit løft framover.

– Denne gongen bestemte Stortinget, og det var vi samde i, at vi gjer dette på riksvegnettet for å kome kjapt i gang, og dette har vi same moglegheita til å gjere på fylkesvegnettet, seier Hareide til NRK.