Ullensvang opplever i desse dagar eit nytt smitteutbrot, med utgangspunkt i Odda vidaregåande skule.

28 er smitta i Ullensvang

Odda vidaregåande skule er plassert på gult smittevernnivå.

I går kom meldingar om totalt 15 nye personar som har fått påvist covid-19. I alt er 28 smitta i ulike delar av kommunen. 27 av dei har kjend smitteveg. Alle dei smitte er relativt unge; den eldste er 45 år gamal. 130 sit i karantene. Det opplyser ordførar Roald Aga Haug i ei pressemelding onsdag føremiddag.

Kommunen har teke over 300 testar frå fredag til og med tysdag. Berre måndag vart over 200 testa, og kommunen reknar med å ta mange fleire prøvar. Arbeidet er omfattande.

Artikkelen held fram under annonsen.

Legesenteret i Odda er prega av innsatsen og har redusert kapasitet til å handtera «vanlege hendingar» dei neste dagane, opplyser Haug.

Kommunen oppmodar alle som har fått ein eller to vaksinedosar, om å testa seg dersom dei er nærkontaktar eller har symptom på covid-19. Kommunen har rikeleg med vaksinedosar, opplyser Haug.