159 er koronatesta i Kvam
Framleis er åtte smitta.
11 ventar på svar. Ein av dei smitta ligg enno på sjukehus.
Det opplyser ordførar Torgeir Næss (Ap) i ei løypemelding til heradsstyret tysdag.
Artikkelen held fram under annonsen.
Færre og færre i helsesektoren sit i karantene. Måndag var berre tre i denne situasjonen. Kapasiteten i sektoren er god, og mange har meldt seg til teneste i naudsituasjonar.
Elles har om lag tjue born fått tilbod i barnehagar og på skular i Kvam i perioden med koronatiltaka. Talet har vore stabilt, ifølgje ordføraren.
– Har festa seg
Regjeringa varsla i dag opning av barnehagane ei veke etter påske, og småskulen veka etter.
– Sjølv om tiltaka lettar noko, tenkjer eg at dei har hatt den effekten at smitteverntiltaka har festa seg skikkeleg i ryggmergen, og at me alle verkeleg kjenner eit personleg ansvar for å hindra smitte. Sidan smitten er under kontroll, unngår me at helsestellet vårt i for stor grad må utsetja og avlysa livsviktig behandling som ikkje har med korona å gjera, skriv Næss i meldinga.
Ber alle påverka
Han er oppteken av situasjonen i det lokale næringslivet. Næringshagen i Hardanger har kartlagt denne. Ifølgje Næss opplyser over 90 prosent at dei har fall i omsetninga, dei fleste mellom 20 og 100 prosent. Vel ein tredel har betalingsvanskar, og cirka to tredelar vil innan 1. mai ha permitterte arbeidstakarar. Mange er usikre på korleis dei statlege kompensasjonsordningane vil slå ut for dei.
Næss meiner Kvam herad må syta for å handsama reguleringsplanar og prosjektera, få oversyn over prosjekt som kan setjast kjapt i gang og påverka dei som har makt til å ta avgjerder. Politikarane bør dessutan ha god kontakt med næringslivet for å få innspel som kan sikra mest mogeleg treffsikre tiltak. Næss er lydhøyr for gode idear, skriv han.
