Vanskelege tider for bedriftene i Vestland
Koronautbrotet har påverka bedrifter over heile landet. I Vestland er mange bedrifter tett knytt til olje- og energinæringa, dei blir spesielt hardt råka av fallet i oljepris og kronekursen.
Næringsalliansen i Hordaland, saman med Sogn og Fjordane Næringsråd, har spurd medlemmene sine korleis koronautbrotet har påverka dei.
– Svaret er alarmerande, seier administrerande direktør i Bergen Næringsråd, Marit Warncke til NRK.
Artikkelen held fram under annonsen.
Over halvparten av bedriftene melde at koronaviruset kan bli kritisk for dei, og at dei allereie har permittert tilsette. Kvar tredje bedrift seier det blir kritisk om situasjon blir verande sånn over lengre tid.
Vestlandet som region husar fleire bedrifter leverandørindustrien til olje- og gassnæringa. Desse bedriftene er spesielt sårbare for oljeprisen og ein svak kronekurs.
– Nokre omtalar det som å bli treft av tre tsunamiar på same tid. Vi er også det største eksportfylket i Noreg, så alt som skjer rundt i verda verkar sterkt inn på Vestlandet, seier Warncke til NRK.
Bedriftene fekk og moglegheit til å seie si meining om kor vellykka dei meiner regjeringa sine tiltak er.
NRK skriv at redusert lønsplikt ved permisjon, kortare arbeidsgivarperiode ved sjukmelding og lågare arbeidsgivaravgift er tiltaka som hjelper vestlandsbedriftene mest, ifølgje undersøkinga.
(©NPK)
