Omsette lokalmat og drikke for 12 milliardar

Hittil i år er det omsett lokalmat og -drikke for nær 12 milliardar kroner i butikk. Det er ein auke på 12,6 prosent samanlikna med 2019, går det fram av tal frå Matmerk.

Sal av mat i daglegvare generelt aukar med 9,6 prosent, medan salet av lokalmat og -drikke aukar med 12,6 prosent, og er dermed den kategorien som veks mest. Spesielt i sommarmånadene har det vore ein solid auke i salet i butikk.

– Pandemien er jo ikkje over. Den klare oppfordringa mi til alle som handlar mat og drikke i Noreg er: Kjøp norsk, støtt lokale produsentar, og hugs at lokalmat og -drikke også er suverene julegåver. Når det er trygt igjen, bruk restaurantar og reiselivsopplevingar. Dei treng all den støtta dei kan få frå oss forbrukarar, seier administrerande direktør Nina Sundqvist i Stiftelsen Matmerk i ei pressemelding.