Publisert 10. juni 2019 kl. 09.38.

Pinsevandring i Strandebarm

Roar Strømme, sokneprest i Vikøy og Strandebarm, innbyr til pilegrimsvandring i kompakt utgåve andre pinsedag. Turen går frå Haukås til Holsete, på god seterveg i lettkupert terreng, og tek vanlegvis ein god halvtime. Men denne dagen vert det nokre stogg undervegs med ein liten meditasjon med skriftlesing, ei bøn og eit salmevers knytt til det ein ser.

- Til saman vert dette ei enkel vandregudsteneste, opplyser soknepresten i eit presseskriv.

- Det skal godt gjerast at vêret vert så ille at turen ikkje er råd å gjennomføra.

Vandringa startar frå parkeringsplassen på Øvre Haukås.

Holsete er ein vakker støl som bør opplevast også av andre enn dei lokalkjende, oppmodar Strømme. Her har det i mange år stått eit klokketårn til bruk ved friluftsgudstenester. Stølen er eit fint utgangspunkt for turar vidare innetter fjellet.

- Men me håpar at mange tek med seg niste og gjev seg tid til ein triveleg «kyrkjekaffi» før ein dreg vidare eller returnerer til Haukås, skriv soknepresten.