Trond Mohn stiller opp for senteret i Kvam, saman med fleire andre. Mohn stiller med både pengar og tomt, men ville ikkje lata seg intervjua av HF om saka. Til høgre står dagleg leiar Helena Bru i Fosse-Stiftinga.

Mohn og stiftingar stiller opp for Fosse-senter

Trond Mohn og sparebankstiftingar vil gje høvesvis 25 og 60 millionar kroner til det planlagde litteratursenteret i Strandebarm.

Sigbjørn Linga Bladstyrar
Charlotte Svendsen Journalist
Ole Kristian Grønneng Journalist
Sara Coucheron Fykse Sara Coucheron Fykse Journalist
Publisert Sist oppdatert

Stønaden på i alt 85 millionar kroner vart kjend på ei offentleg tilskiping i idrettshallen i Strandebarm tysdag. Her vart ytinga feira med kake, folkefest og langvarig applaus.

Trond Mohn nytta taletida til å tala sparebankane si sak for å sikra berekraftige lokalsamfunn. Han fekk ros av styreleiaren i Fosse-Stiftinga for å bruka pengar på samfunnsbyggjande tiltak.

To oppgåver

I tillegg til dei 25 millionane frå Mohn vart det kjent at Sparebanken Norge, Sparebankstiftelsen Sparebanken Norge, Vest og Sparebankstiftinga Hardanger – trekk gjerne pusten her – vil støtta prosjektet med i alt 60 millionar kroner.

Det fortalde dagleg leiar Frank Johannesen i fyrstnemnde stifting til forsamlinga. Han slo fast at senteret vekkjer monaleg engasjement.

Sparebankstiftinga Hardanger yter ei av dei største løyvingane i historia si, opplyste dagleg leiar Fredrik Fjose. Han minte om at stiftinga frå før har ytt om lag 4,5 millionar kroner til ymse prosjekt i regi av Fosse-Stiftinga.

– De har to oppgåver: skaffa resten av pengane og verna om sparebankane, sa Mohn til forsamlinga.

– Det er bra at ikkje alle rikingar reiser til Sveits, konstaterte styreleiar Valgerd Svarstad Haugland i Fosse-Stiftinga då ho takka pent for gåvene.

Dagleg leiar Helena Bru og styreleiar Valgerd Svarstad Haugland (t.h.) hadde ein stor dag og var fjelga på kvar sin måte. Også dei andre i stiftinga fekk ros for langvarig innsats for senteret.

– Dette er meir enn eg hadde drøymt om. Ein fantastisk inspirasjon, sa ho.

Litt om framdrift

Når det gjeld framdrifta, opplyste styreleiaren at fleire nabokommunar har svara positivt på oppmodinga frå Fosse-Stiftinga om støtteerklæringar til senteret på Tangerås. Svaret på søknaden om stønad til senteret kjem ikkje før regjeringa legg fram budsjettframlegget i oktober.

For tida går det føre seg ei arkitekttevling med frist i midten av juni for å koma med framlegg.

– Det har vore hundrevis av spørsmål frå ulike arkitektar, sa Haugland.

Ein jury skal plukka ut tre framlegg som skal få vera med vidare i tevlinga. Mellom andre ordføraren i Kvam og Haugland har plass i denne. Vona er å vera i mål med konkurransen i november.

– Kjem til å koma

Både ordførar Torgeir Næss (Ap) i Kvam og fylkesvaraordførar Stian Opedal Davies (Ap) i Vestland tala og takka. Dei hadde ikkje kroner å lova, ettersom støtta førebels er av det moralske slaget, men båe er overtydde om at «senteret kjem til å koma».

– Dette vert ei god draghjelp for oss, sa Næss, som slo fast at velviljen er stor.

– Spørsmålet er kor fort det kjem. Me er nærare enn nokon gong, og gåvene fører oss eit kraftig skritt framover, sa han.

Davies sa at han har trua fordi dei som står bak, har gjennomføringsevne. Han lova å «lobba» hardt mot staten.

– Dette er ein stor dag for heile nasjonen, sa Davies.

Dagen vart feira med kake i idrettshallen. På grunn av vêret vart arrangementet flytta dit. Alle var inviterte. Også 5.–10. klasse ved Strandebarm skule var til stades i skuletida.

Etter lovnadene manglar om lag 271 millionar kroner til nybygget, som er kostnadsrekna til 356 millionar kroner i søknaden om statleg stønad til nasjonale kulturbygg (sjå faktarute).

Fosse-senteret

• Fosse-Stiftinga har, etter ein prosess i ei prosjektgruppe med fleire partar i haust, søkt staten om tilskot gjennom ordninga Nasjonale kulturbygg til eit Fosse-senter i Strandebarm til ære for forfattar og nobelprisvinnar Jon Fosse.

• Det planlagde nybygget er stipulert til å kosta 355,9 millionar kroner med moms.

• Finansieringsplanen byggjer på 70 prosent statleg støtte, det vil seia 249 millionar kroner, medan fylkeskommunen og Kvam herad er førte opp med investeringar på 29 millionar kroner kvar.

• Søknaden gjeld eit bygg på 2.600 kvadratmeter med plass til 150–200 samtidige gjester og ei scene i tråd med krava til Riksteatret. I tillegg skal barndomsheimen til Jon Fosse og Fossehuset vera del av senteret.

• Drifta er skissert med om lag 10 årsverk og eit årleg budsjett på 20,75 millionar kroner.

I søknaden er det skissert at staten skal dekkja 70 prosent av kostnaden, eller 249 millionar kroner. Om det skjer, vil både Kvam herad og fylkeskommunen sleppa billegare frå det enn det som er skissert i søknaden.

I søknaden er nybygget plassert på den tidlegare skuletomta på Tangerås, nærare bestemt der den gamle ungdomsskulen ligg.

Ein heil bøling med ymse gjevarar i lag med sentrale krefter i Fosse-Stiftinga og nokre sentrale folkevalde vart fotograferte.
jon fosse fosse-stiftinga kvam herad litteratur vestland fylkeskommune strandebarm kultur

Siste nytt

Laga med Labrador CMS