I fjor fekk Sondre Justad liv i leiren på Bygdalarm. I år vert festivalen, som hadde mellom andre Big Bang og Odd Nordstoga på plakaten, ingenting av som følgje av koronatiltak. Foto: Sigbjørn Linga

Ingen Bygdalarm i sommar

Festivalen tidleg i juli ryk etter nye føringar frå regjeringa i dag.

– Då kom den kjipe, men venta og forståelige beskjeden, og det blir ikkje Bygdalarm på plenen i år. Me jobbar på spreng med å områ oss, og kjem tilbake med meir info om refusjon og denslags så snart me kan. Me håpar og trur på godstemning med fjord, fjell og fenalår i 2021, skriv festivalen på Facebook i dag.

Bakgrunnen er at kulturminister Abid Q. Raja (V) laurdag gjorde kjent at forbodet mot store kultur- og idrettsarrangement med fleire enn 500 deltakarar vert lengt frå 15. juni til 1. september.

Avgjerda inneber òg at planen om å flytta Øystese cup til august kanskje ikkje lèt seg gjennomføra om ikkje omfanget vert redusert. Cupen var opphavleg planlagd to helgar i mai. Øystese fotball har ikkje gjeve opp vona om å avvikla cupen over to helgar med færre enn 500 deltakarar.

Frå før er Hardanger trebåtfestival og Hardingtonar avlyste, i tillegg til fleire andre festivalar i Hardanger. Også Tysnesfest måtte i dag gje opp sommarens festival.